ملفات وتحقيقات

قصة من عدن : *حجامة ماتمت

الأربعاء 05 يونيو 2019 06:28 صباحاً كتب / خالد محمد شمسان


قبل فترة توكلت على الله وذهبت اعمل حجامة بعد نصائح الاهل وكثير من الاصدقاء الذين اكدوا لي بان الحجامة ستجدد نشاطي وباتخلينا اجري كالحصان..

انا غشيم في هذا الجانب ولانني اول مرة احجم كنت مرعوب من تقطيع الجسم بالموس وشفط الدم ومتردد في عمل الحجامة بس تشجعت عندما تبرع صديق عزيز لمرافقتي بسيارته..

رحنا الى مسلخ الحجامة وطول الطريق افسر بالعملية وماانتبهت الا وصاحبي يقول وصلنا..

دخلنا السلخانة وفي غرفة التقطيع بالموس شفت رجل جالس بلا قميص وهم يشفطوا الدم من جسده خفت قلت لصاحبي: ايش رأيك نروح ونرجع يوم ثاني حتى اكون مستعد نفسيا..
صاح : عيب عليك قد نحنا عندهم ونهرب..

شعر الحجام بنا ونحنا نهمس لبعض قال لي : اخلع قميصك والفانلة وتعال اجلس قدامي..
لفت لصاحبي قلت : الاخ مستعجل..
قال : قوم اجلس امامه خلينا نخلص ..
خلعت القميص والفانلة وجلست امامه وقلت له :
طيب مله اسمعنا بااقول لك فين يوجعنا..قال : اول الركب مكانين في كل ركبه وبعدين انت قول فين يوجعك..
قلت له : ذراعي مااقدر ارفعها رد بسرعة
وقال : هذا يحتاج مكانين في الذراع وواحد في الرقبة وايش كمان؟ 
خفت قلت له : بس مافي شيء ثاني..

قال لي ارفع الفوطة بانبدأ بالركب وانا قلبي بدأ يدق سريع مع قليل رشح في الجبهة من الفجعة..

اول ماركب الشفاطات زادت نبضات القلب كضربات طبل كبير ولما سحب الشفاطة الاولى ومسك الموس بهررت بعيوني على مكان التقطيع وبدأ يقطع والدم ينزل وانا بردت وجسمي يرشح وهو يقطع كنت اشوف الغرفة تدور رفعت ذراعي امسك صاحبي..

ولادريت الا بعد نصف ساعة وانا مدد في غرفة جانبية والحجام وصاحبي وواحد ثالث والحجام يقول : اول مرة تحصل معنا مثل هذه الحادثة ذا الحاج ضعيف مرة وخواف كان بايحنب لنا..وصاحبي يقول : مالك ياخالد ايش استوى لك ؟ قلت له: روح بي الان.. 
قال الحجام : اصبر بااعطيك تمر وقهوة تشرب ولما تصحى تمام روح ..

تمددت عندهم نصف ساعة واكلت التمر مع القهوة وقمت مسنود على صاحبي وركبنا سيارته وروحنا..

في الطريق قال صاحبي : ايش استوى لك ؟ قلت له : دوخت قدامك ليش عادك تسأل؟ خلاص روح بي وصلت البيت وساني تمددت على سريري والحجة تقول : شوف كيف الحجامة تنفع حتى صورتك تغيرت وطار المرض من جسمك ابتسمت في سري وقلت : اح منكم ياحريم اح
قبل قليل كنت بااموت وهي تقول الحجامة نفعتنا ورجعت طرزان..!!

(ناوي ارجع احجم هذا الشهر ..خلاص بااقوي قلبي..كيف تشوفوا..؟؟)


تعليقات القراء
389391
قصه حلوه | منصر
الأربعاء 05 يونيو 2019
زوك زوك يابن دبع ..


شاركنا بتعليقك